Sereto sa Majakwane a ga Sebaka

Myself welcoming Kgoši Setlamorago Thobejane (red tie) and members of his royal council (Kgoro ya Moshate) to my home (kgorong ya Majakwaneng) during a family event

Hee Majakwane a Maatladi a Shego!

Kera lena batho ba ga bo Sebaka Sedumaedi,
Se ba rego a se dume se a bitša
Se bitša Phaahla 'a Mogoto 'a Phogole
Nna re batho ba gabo Kganya 'a Ramaredi 'a Tshwane
Ba re ga gešu ga bo Kganya a re ke re dumediša moeng,
moeng ke yena a rego Tama Sebaka! Nna ra re Thobela! Motho wa mosepedi.

Nna re batho ba bo Mamoropje a thothoma magotlo!
A Podi 'a Mokidikwane 'a Sekgophi sa Ngoato!
Re batho ba bo Mantlako o a tšhoša, ba re Bauba o tšhošitše bale ba le ka mphatong, ba re go tšhaba ba ba ba tlogela le dikgago.
Nna re batho ba bo Nkatane 'a Maatladi 'a Shego!
Ba rego Phaahla ge ke e ja motho ke a kgetha!
Ke leseditše ba dintana le dintšhi le ditšhikidi ba feta, ke leseditše maaparathamaga, ke leseditše ba metšega ya diphukubje!
Nna re batho ba bo Mpelegeng ka kobo ya sebata, ba re le nna mokgatla wa tau o a ntshwanela!

Re batho ba bo Phusele Ngoato seaga ka lenoto!
Seemanong ga matlapa a dikolokotla, Seemanong ga bo Modiane le bo Ramothakgele!
Re batho ba bo Sellelepoo sehlwa se elwa le poo Mahlabeng, ke poo e tšhupu ya mmala phatleng!
Ba re kgarebe tša ga Poo ba itše ba e bona e fologa, ba re e reng ya swana le tša Magadimane?
Ba go e tseba ba re aowaowa! Yela ke ya ba ga Mashegwana!
Ke ya ba ga Sebaka Sedumaedi,
Ke ya batho ba bjala bja go apeiwa ka monoto le mokgwakgwatha le modimore gomme ba tšee peila ba peile!
Nna re batho ba bo Phahladi e mošweu diatla le matsogo!
Re batho ba bo Tholontona Modipadi!
Thari le lebotse ka motšeka Seemanong,
Bana ba tau e ntsho ya mariri!

Nna re batho ba bo Mokgalehlodi!
Ba re Bauba e sale a šia 'šaba la go ana mollo, e sale a šia barwana Bokgatla re tšwago.
Nna ga gešu Bokgatla re tšwago re tšwa re bina tau, bjalo ba re a re sa bina tau re hlanogile.
Re bina noko le ba Magakala 'a Maatlopo 'a Mogodumo!
A kgoši leakampa leakabose a Madiša 'a Tjate
Tlogela go etiša mogobo pele, gobane madira a sa le golelele ga kgole ga naga!

Re tšhaba baditi!!